पोखरा, १५ वैशाख २०८२
पोखरा–१७, गण्डकी कोटिहोममा आज वैशाख १५ गते भरतपुर महानगरपालिकाकी प्रमुख रेनु दहालको उपस्थितिमा विशेष कार्यक्रम आयोजना हुँदैछ। उनको सहभागिताले कार्यक्रमको गौरव थप बढाउने विश्वास गरिएको छ।
४१ दिनसम्म सञ्चालन हुने श्रीगण्डकी शत कुण्डीय गायत्री कोटिहोम विराट ज्ञान महायज्ञ–२०८२ अन्तर्गत यहाँ २१ फिट लामो रुद्राक्षले सजिएको शिवलिङ्ग र भव्य हवनकुण्ड निर्माण गरिएको छ। वैशाख ३ गते भूमिपूजनसँगै यज्ञकुण्ड निर्माण कार्य सम्पन्न भइसकेको थियो।
महायज्ञमा भक्तजनहरूलाई घ्यू, तील, तेल, देवदार, श्रीखण्ड लगायतका सामग्रीसहित सहभागी हुन आग्रह गरिएको छ। सुश्री अनुराधा पाण्डेय र अन्तर्राष्ट्रिय कथा प्रवक्ता देवी प्रतिभाले कथा प्रवचन आरम्भ गरिसकेका छन् भने दीनबन्धु पोखरेल, चैतन्यकृष्ण महाराज र सुप्रिया किशोरीजस्ता धर्मगुरुहरूले पनि सहभागिता जनाउनेछन्।
यज्ञ अवधिभर भजन, सत्सङ्ग, पूजापाठ, आरती तथा सांस्कृतिक कार्यक्रमहरू नियमित रूपमा सञ्चालन हुनेछन्। साथै, सामाजिक सञ्जाल भिडियो प्रतियोगिता, राष्ट्रिय भजन प्रतियोगिता र वक्तृत्वकला प्रतियोगिता आयोजना गरी सांस्कृतिक अभिव्यक्ति र सहभागितालाई प्रोत्साहन गरिनेछ। आयोजकले देश–विदेशबाट लाखौं भक्तजनको सहभागिता अपेक्षा गरेको छ।
दैनिक कथा वाचन र सामाजिक कार्यमार्फत समाजमा सकारात्मक परिवर्तन ल्याउँदै आएकी देवी प्रतिभाको सक्रियता र प्रमुख दहालको सहभागिताले गण्डकी कोटिहोमको अभियानलाई अझ सशक्त बनाउने अपेक्षा गरिएको छ।