धानबारी गोड्न गएकी कञ्चनपुरको दोधारा चाँदनीकी हिराकुमारी शाह (साहु)को नरभक्षी बाघको आक्रमणबाट ज्यान गएको छ, दुई दिनअघि मात्रै स्थानीय अर्की एक महिलालाई उत्त बाघले घाइते बनाएको थियो ।
आँखै अगाडिबाट हिरालाई हेर्दाहेर्दै बाघले घाँटीमा समातेर उखुबारीमा लगेर मारेको उनकि जेठानि मिनाले बताइन् । ‘दुई–तीन दिनदेखि गाउँमा बाघ आएको हल्ला चलिरहेको थियो, कोहिले त देखेकापनि रहेछन्, हामीले हल्ला मात्रै सुन्यौँ,’ उनले भनिन्, ‘गाउँका सबै महिला घाँस काट्न गए, देउरानी पनि गइन् । म खेत पुगेर घरायसी काममा धारामा पुग्दासम्म देउरानीलाई त्यहाँबाट उखुबारीमा लगिरहेको देखेर चिच्याएँ, मेले केहि गर्न सकिन।’
घटना लगत्तै कञ्चनपुरको दोधाराचाँदनी नगरपालिका– २ कमलशाही टोलकी २६ वर्षीया हिराकुमारी शाहको ज्यान लिने बाघ खोज्न हात्ती परिचालन गरिएको थियो बिहीबार बिहान साढे १० बजेतिर बाघको आक्रमणबाट शाहको मृत्यु भएको थियो । बाघ खोजीका लागि शुक्लाफाँटा राष्ट्रिय निकुञ्जका चार हात्ती र प्राविधिक टोली परिचालन भएको थियो । ४ घण्टासम्म प्रयास गर्दा पनि बाघलाई नियन्त्रणमा लिन सकिएको थिएन । शुक्रबार थप १ हात्ती प्रयोग गरेर ५ हात्तीसँगै प्राविधिक परिचालन गरेपछि बाघ नियन्त्रणमा आएको हो ।
आफ्नै धानबारी गोड्न गएकी हिरालाई नजिकै उखुबारीमा लुकेर बसेको बाघले आक्रमण गरेको थियो । ठूलो क्षेत्र रहेको उखुबारीभित्रै बाघ रहेको निष्कर्षसहित हात्ती परिचालन गरिएको निकुञ्जका सूचना अधिकारी मनोजकुमार ऐरले बताए । ‘बाघ नियन्त्रण गर्न चिकित्सकको टोलीले डार्ट गन हानेर बेहोस बनाउँछ,’ उनले भने, ‘बेहोस भएको बाघलाई नियन्त्रणमा लिन्छौँ ।’ निकुञ्जमा वन्यजन्तु नियन्त्रण, उद्धारका लागि जनशक्ति र स्रोत डार्ट गन भए पनि औषधि नहुँदा बर्दियाबाट मगाएको उनले बताए । ‘ठूला वन्यजन्तु बेहोस पार्न जताततै औषधि पाइँदैन,’ उनले भने, ‘हामीसँग पनि नभएकाले बर्दिया राष्ट्रिय निकुञ्जबाट मगाएका हौँ।’
बाघ भारतीय पिलिभित टाइगर रिजर्भ जंगलबाट नेपाल आएको स्थानीयले अनुमान गरेका छन् । दोधाराचाँदनी नगरपालिकाले मृतक परिवारलाई किरिया खर्चबापत ५० हजार रुपैयाँ सहयोग गर्ने निर्णय गरेको छ । दोधाराचाँदनी नगरका मेयर किशोरकुमार लिम्बूले विपत् व्यवस्थापन समितिको बैठकले मृतक परिवारलाई राहतस्वरूप पालिकाबाट नगद सहयोग गर्ने निर्णय गरिएअनुरूप छिट्टै हस्तान्तरण गर्ने बताए ।
दुई दिनअघि मात्र शुक्लाफाँटा नगरपालिका–५ खजुवाकी ३० वर्षीया मानमती साउद बाघको आक्रमणबाट घाइते भएकी थिइन् । गत वर्ष बेलौरी नगरपालिका– ८ पचुईकी ४० वर्षीया गंगा चन्दको पनि बाघको आक्रमणबाट ज्यान गएको थियो ।
Link: https://www.facebook.com/smarttvnepal79/videos/348533948191504