🧠 "बुद्धिमान सन्तानको पल्टन" बनाउँदै एलन मस्क, प्रेम, परिवार र प्लानको रहस्यमयी संसार

 मानव जातिलाई मंगल ग्रहमा बसोबास गराउने सपना देख्ने एलन मस्क अब पृथ्वीमै ‘बुद्धिमान सन्तानको पल्टन’ निर्माणमा जुटेका छन्। प्राविधिक नवप्रवर्तनका लागि चिनिने मस्कले आफ्ना विचार जस्तै निजी जीवनमा पनि अनौठो यात्रा तय गरिरहेका छन्।

उनी सधैंजसो विकसित देशहरूलाई धेरै बच्चा जन्माउन प्रेरित गर्छन् — र त्यो सन्देश उनले आफैँबाट सुरु गरेका छन्। हालसम्म कम्तीमा चार महिलाबाट १४ जना सन्तानका पिता भइसकेका मस्कले आफ्ना छोराछोरीका लागि टेक्सासको अस्टिनमा छुट्टै कोलोनी बनाउने योजना बनाएका छन्। त्यहाँ मस्कको कम्पनी न्युरालिंककी अधिकारी शिभन जिलिस र उनका चार सन्तान पनि बस्दै आएका छन्।

द वाल स्ट्रिट जर्नलको रिपोर्ट अनुसार, मस्कका निजी सहायक जेरेड बर्चलले उनको 'फेमिली अफिस' सम्हाल्नुका साथै, ती सबै सन्तान र आमाहरूको व्यवस्थापन पनि गर्छन्। मस्क आफैँ डोनाल्ड ट्रम्पको डोज विभागमा पनि सक्रिय छन्।

खास चासोको विषय भने मस्कको एक छोरा जन्माएकी एश्ली सेन्ट क्लेयरसँगको सम्बन्ध हो। उनले मस्कलाई आफ्नो सन्तानको पिता घोषणा गराउन डिएनए परीक्षण र कानुनी प्रक्रिया सुरु गरेपछि, बर्चलले उनलाई १५ मिलियन डलरको मौनताको प्रस्ताव गरेका थिए, जुन पछि २० हजार डलर मासिक किस्तामा झारिएको दावी गरिएको छ।

मस्कका अनुसार, तीक्ष्ण बुद्धि भएका सन्तानले भविष्य निर्माण गर्छन्। त्यसैले उनले आफ्ना सामाजिक सञ्जाल एक्स (Twitter) को प्रयोग पनि यस्ता महिलाहरू खोज्न थालिसकेका छन्। डिएममार्फत बच्चा जन्माउन प्रस्ताव गर्नेसम्मका काम उनी गर्छन्। क्रिप्टो इन्फ्लुएन्सर टिफ्यानी फङ पनि त्यस्तै प्रस्ताव पाउनेमध्ये एक थिइन् — तर उनले अस्वीकार गरेपछि मस्कले उनलाई अनफलो गरे।

मस्कले यस्ता सम्बन्धहरूलाई कानुनी रूपमा सन्तानको पहिचान दिन नसक्ने भए पनि उनीहरूलाई पर्याप्त आर्थिक सहयोग गर्ने गरेका छन्। उनको यही फरक तरिका र सोचले मस्कलाई आज विश्वकै सर्वाधिक चर्चित र रहस्यमयी व्यक्ति बनाइरहेको छ।